INDEX

MANGALA SUTTA 10. Yaṁ mangalaṁ dvādasahi, Cintayiṁsu sadevakā, Sotthānaṁ nādhigacchanti, Aṭṭhattiṁsañca Maṅgalaṁ. 11. Desitaṁ Devadevena, Sabbapāpavināsanaṁ , Sabbalokahitatthāya, Maṅgalaṁ taṁ bhaṇāma he. 12. Evaṁ me sutaṁ. Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme. Atha kho aññatarā devata abhikkantāya rattiyā abhikkantavaṇṇā kevalakappaṁ Jetavanaṁ obhāsetvā , yena Bhagavā tenupasaṅkami ; upasaṅkamitvā Bhagavantaṁ abhivadetva eka-mantaṁ aṭṭhāsi; eka-mantam ṭhitā kho sā devatā Bhagavantaṁ gāthāya ajjhabhāsi: 13. “Bahū devā manussā ca, Maṅgalāni acintayuṁ, Ākaṅkhamānā sotthānaṁ, Brūhi maṅgalamuttamaṁ.” 14. “Asevanā ca bālānaṁ, Paṇḍitanañca sevana, Pūjā ca pūjaneyyānaṁ , Etaṁ maṅigala-muttamaṁ.” 15. Patirūpadesavāso ca, Pubbe ca katapuññatā, Attasammāpaṇidhi ca, Etaṁ maṅgalamuttamaṁ. 16. Bāhusaccañca sippañca, Vinayo ca susikkhito, Subhāsitā ca yā vācā, Etaṁ maṅgalamuttamaṁ. 17. Mātāpitu-upaṭṭhānaṁ, Puttadārassa saṅgaho, Anākulā ca kammantā, Etaṁ maṅgalamuttamaṁ. 18. Dānañca dhammacariyā ca, Ñātakānañca saṅgaho, Anavajjāni kammāni, Etaṁ maṅgalamuttamaṁ. 19. Āratī viratī pāpā, Majjapānā ca saṁyamo, Appamādo ca dhammesu, Etaṁ maṅgalamuttamaṁ. 20. Gāravo ca nivāto ca, Santuṭṭhi ca kataññutā, Kālena Dhammassavanaṁ, Etaṁ maṅgalamuttamaṁ. 21. Khantī ca sovacassatā, Samaṇānañca dassanaṁ, Kālena Dhammasākacchā, Etaṁ maṅgalamuttamaṁ. 22. Tapo ca brahmacariyañca, Ariyasaccāna dassanaṁ, Nibbāna-sacchikiriyā ca, Etaṁ maṅgalamuttamaṁ. 23. Phuṭṭhassa lokadhammehi, Cittaṁ yassa na kampati, Asokaṁ virajaṁ khemaṁ, Etaṁ maṅgalamuttamaṁ. 24. Etādisāni katvāna, Sabbattha maparājitā, Sabbattha sotthiṁ gacchanti, Taṁ tesaṁ maṅgalamuttamaṁ.